पोलियो रोग उन्मुलनका लागि सिन्धुपाल्भचोकमा अभियान थालियो
जीवन श्रेष्ठ, सिन्धुपालचोक । सिन्धुपाल्चोकमा पोलियो विरुद्धको खोप अभियान आइतबारबाट सुरु भएको छ ।

जिल्लाभर १४ हजार ९ सय १२ जना बालबालिकालाई पोलियो रोग विरुद्धको आई.पि.भी. खोप लगाईने लक्ष्यका साथ अभियान आज आइतबारबाट सुरु भएको हो ।

चौतारास्थित श्री कृष्ण रत्नगंगा मावि खोप केन्द्रमा आयोजित एक समारोहका बीच चौतारा साँगाचोकगढी नगरपालिका मेयर कृष्णप्रसाद सापकोटाले जनस्वास्थ्य कार्यालय सिन्धुपाल्चोककी प्रमुख दुर्गा बजगार्ईँलाई पोलियो विरुद्धको भ्याक्सिन हस्तान्तरण गर्दै सो अभियानको उद्घाटन गर्नुभयो ।

सो अवसरमा उहाँले नेपालबाट मात्र नभई विश्वबाट नै पोलियो रोगको उन्मुलन हुनेमा विश्वास व्यक्त गर्नुभयो ।
जिल्ला समन्वय समिति सिन्धुपाल्चोकका उपप्रमुख पदमनाथ नेपालको अध्यक्षतामा भएको कार्यक्रममा चौतारा साँगाचोकगढी नगरपालिका वडा न ५ का अध्यक्ष शिव श्रेष्ठले स्वागत गर्नुभएको थियो ।

१२ पालिका रहेको सिन्धुपाल्चोकमा अधिकाँश पालिकाभित्रका विद्यालयहरुमा केन्द्र व्यवस्थापन गरेर अभियान सञ्चालन गरेको जनस्वास्थ्य कार्यालय सिन्धुपाल्चोकले जनाएको छ ।
२०७३ वैशाखदेखि २०७५ असोज महिनासम्म जन्मिएका बालबालिकाले खोप नपाएको हुँदा यस पटक जिल्लाका १२ वटै स्थानीय तहमा रहेको अधिकाँश बिद्यालयहरुमा खोप केन्द्र सञ्चालन गरि बालबालिकालाई खोप लगाइउने अभियान सञ्चालन भएको जनस्वास्थ्य प्रमुख दुर्गा बजगाईले जानकारी दिनुभयो । जसको लागि १० हजार ६ सय ६९ जना बिद्यालय क्षेत्रका वालवालिका सम्पर्क रहेको उहाँको भनाइछ ।
धेरै जसो बालबालिका विद्यालयमा भेटिने र विद्यालय बाहिर रहेका ६९ जनालाई पनि खोपको पहुँचमा ल्याइने भएको छ । छुटपुटको खोजी गरि अभियानपश्चात पनि स्वास्थ केन्द्रमा खोप दिने व्यवस्था मिलाईएको जनस्वास्थ्य प्रमुख बजगाईँले जानकारी दिनुभयो ।
अभियान जेठ १३ गतेबाट जेठ १७ गतेसम्म सञ्चालन हुनेछ ।